Sunday, Apr 20th

Last update03:38:03 PM GMT

You are here Karya Tulis Jilatang Sia ayah E, Bingkaruang ?

Sia ayah E, Bingkaruang ?

E-mail Cetak PDF

Tabik paluah Mangkutak baliak dari Bukittinggi mancaliak urang-urang nan kanai gampo.
Banyak rumah, toko, kantua, surau,musajik, rumah sikola nan runtuah.
Ado pulo nan tatimbun.
Namun samantangpun baitu, nan mambuek Mangkutak tagagau, kutiko nyo mancaliak jam gadang tu indak iduik lai.
Jarum jam gadang tu lah baranti baputa.
Kutiko lah sampai di rumah, Mangkutak manamui aciaknyo nan banamo Sabai Nan Aluih tu.

"Iko lah alamaik buruak ka sagalo urang Minang mah ciak. Jarum jam gadang di Bukik tinggi tu indak manggarik lai dioyak dek gampo. Kecek urang-urang di sinan, iko adolah tando bahaso wakatu lah mati dek urang Minang. Urang Minang ko indak ka bisa manga-manga lai, baiak sacaro nasional apolai sacaro internasional," kato Mangkutak.

"E, Mang. Waang musti bisa mamakai utak. Soal jarum jam gadang tu indak bisa manggarik lai dek karano dioyak gampo, itu kan dek karano masin jam gadang tu bana mungkin lah rusak. Indak ado kaitannyo jo nasib urang Minang nan banyak ko doh. Kok dipelok i baliak, lalu iduik jam gadang tu baliak, baa nasib urang Minang ko? Langsuang pulo barubah? Baa waang ko Mang. Stek stek waang jadian sadonyo tu kiramaik. Jam gadang lah, baringin gadang lah, rumah gadang lah," kato Sabai berang.

"Aciak jaan salah. Memang banyak nan kiramaik di nagari awak ko. Cubo bayangan dek aciak. Manuruik koran-koran nan den baco, labiah banyak urang Minang ko manyumbang ka Istano Basa nan alah tabaka tu daripado manyumbang ka urang nan taniao dek gampo. Itu tandonyo, urang Minang ko labiah picayo ka nan kiramaiak daripado ka urang nan kanai gampo. Gampo tu tajadi dek karano Istano Basa tu tabaka, lai jaleh dek aciak?" kato Mangkutak kareh hangok.

Sabai takangkang dek galak dek karano Mangkutak mangaik-ngaik an tabakanyo Istano Basa di Pagaruyuang jo gampo gadang nan malendo saluruah nagari ko.
Bisa jadi juo, baranti jarum jam gadang tu baranti pulo utak urang Minang ko bapikie waras.
Tapi Sabai indak namuah mangecek saroman tu ka Mangkutak tudoh.
Sabai takuik, kok salah paham pulo Mangkutak beko, manuduah utak urang Minang ko baranti bapikie waras. Nyo aliahan sajo ka persoalan lain.

"Mang. Takajuik Ai mandanga kecek waang tadi mah Mang," kato Sabai maaliah an persoalan.
"Kecek nan ma ciak?" tanyo Mangkutak.

"Kecek waang tadi. Labiah banyak urang Minang ko manyumbang ka Istano Basa nan ditembak patuih tu daripado manyumbang ka urang nan rumahnyo kanai gampo. Iyo bana tu?" tanyo Sabai mayakinkan dirinyo surang.

"Iyo ciak. Baitu koran-koran manulih. Itu aratinyo, urang Minang ko labiah picayo ka nan kiramaik daripado urang nan kanai gampo," jawek Mangkutak saroman urang dapek angin.

"Manuruik Ai, bukan dek karano Istano Basa tu kiramaik lalu urang banyak manyumbang doh Mang," kato Sabai.
"Kalau indak dek karano kiramaik, dek karano apo?" tanyo Mangkutak.

"Mang danga kecek Ai elok-elok. Jaan emosi-emosi ndak. Kalau banyak urang manyumbang ka Istano Basa, kan tampak bakeh sumbangan tu. Manyumbang atok awak, nampak atok tu. Manyumbang pintu awak, nampak pintu tu. Apo nan awak sumbangan tampak jaleh dek urang banyak. Sumbangan awak tu bisa pulo awak sabuik-sabuik ka urang banyak. Tapi kalau manyumbang ka urang nan kanai gampo, apo nan ka nampak dek urang lain? Indak bajajak sumbangan tu doh. Saroman mancampak an aie ka lauik," kato Sabai.

"Jadi manuruik aciak urang manyumbang ka Istano Basa tu dek karano supayo sumbangannyo tampak dek urang? Indak dek karano Istano Basa tu kiramaik doh? Kalau baitu, sumbangan urang tu pakai pamrih. Supayo awak dipuji-puji urang, baitu?" tanyo Mangkutak.

"Waang bajujur sajolah Mang. Sadangkan basidakah awak ka musajik mopiah, masuak sarugo nan awak arok di akhirat isuak. Mopiah imbalannyo sarugo! Apo lai kalau urang manyumbang limo juta untuak Istano Basa. Baa gak ati waang Mang? Lai bisa jujur waang ka diri waang ndak?" tanyo Sabai maaujak hati Mangkutak.

"Jadi manuruik aciak, itu sababnyo labiah banyak sumbangan untuak Istano Basa daripada sumbangan untuak urang nan kanai gampo? Iyolah tabaliak edong bana urang awak komah ciak," solo Mangkutak.

"Jadi, sakali lai Ai tegaskan ka waang Mang. Indak dek karano Istano Basa tu kiramaik doh, indak dek karano Istano Basa tu aset budaya atau bukti sejarah doh mako banyak urang manyumbang. Tapi dek karano satiok urang Minang nan waras, nio namonyo dicatat supayo manjadi sajarah pulo dek anak cucu isuak," kato Sabai.

"Atau, supayo mereka tu nak disabuik-sabuik pulo sebagai keturunan-katurunan rajo ndak?" solo Mangkutak.

"Jaan salah-salah waang Mang. Kalau indak ditembak patuih Istano Basa tu, mungkin ado urang nan ka dilantiak manjadi rajo di Istano Basa tu," kato Sabai.

"Urang ma ciak? Urang Pagaruyuang juo?" tanyo Mangkutak.

"Ntah. Indak jaleh dek Ai doh. Keceknyo katurunan Pagaruyuang. Tapi niniak muyangnyo dari Gunuang Sitoli," jawek Sabai sambia mampaarek lakek kainnyo.

"Sia ayah e," tanyo Mangkutak maniruan gaya kecek urang Piaman. "Bingkaruang?" kato Mangkutak sambia galak takakah-kakah sambia turun janjang rumah gadangnyo.

Dikarang oleh : Wisran Hadi