Urang Minang.com

Kampuang ambo di Singkarak
Dalam lagu denai pasankan
Simpang limo labuah basilang
Sinan tatagak rumah potong
Anak ojek di simpang jalan
Sumani kampuang keteknyo
Di kantua polisi jalan bakelok
Di bawah barumah makan
Talatak di kelok talago

Adiak Kanduang nan rancak tacelak
Galak ka mano den gambarkan
Nan co kayu ditarak tukang
Bak kitab dibaco malin
Antah di ruang tapak tangan
Di sinan indak ka lupo

Oi gajai ,, Adiak oi

Nan Si Sur barumah makan
Pandai mamasak samba dagiang
Samba nan sero nyo hidangkan

Kasiah jo Adiak lah mandalam
Sayang lah jadi darah dagiang
Indak ado talok mamisahkan

Oi gajai ,, Adiak oi

Adiak mandi, denai manyauak
Nak sasumua kito baduo
Adiak mati, ambo baramuak
Nak sakubua kito baduo

***

Mulonyo indak ka baparang
Urang asiang pangka balanyo
Nyo adu urang sanagari
Lah tajadi tembak-manembak
Tiok manembak, tiok kanai

Lah banyak nyawo nan malayang
Dek kito ambiak ka padoman
Nak jan taulang maso nan lalu
Kok taulang kito nan seso
Kusuik sia lah manyalasaian

Mulonyo tajalin kasiah jo sayang
Sabab lah suko samo suko
Dari muluik turun ka hati
Raasonyo indak urak lai
Cameh mukasuik tak ka jadi

Jannyo Adiak ,, Adiak sayang
Dek denai capek maiyokan
Haram Lillah denai kok tau
Sayang digurau mah kironyo ,, Adiak oi
Balanyah kami, baciciakan

Padi rang enak karuang goni
Masak nan baru parampiangan
Mandaki bukik tanah sirah
Dapeklah kudo balang kaki
Gujarat kamba di bulunyo

Lah sanang bana Adiak kini
Duduak bagandiang jo pamenan
Lah dapek gadiang nan batuah
Tasisiah tanduak kabau mati
Ambo lah suruik ka hinonyo ,, Adiak oi

***

Tanjuang Piaman dahulunyo
Malilik koto nak rang Bintan
Ditanam tabu di tabiang
Tinggi lah balam tigo gayo

Bungo pamenan dahulunyo
Kini dilingka aka rotan
Apo ka tingga nan di rantiang
Kini mananti patah sajo

Oi gajai ,, Adiak oi

Siang seso, malam bajago
Baiko nasib tukang dendang
Kalau lah malang nan ka tibo
Buruang bapaga kini tabang

Bamulo diikek kasiah jo sayang
Di Singkarak kasiah dipadu
Ganggam nan indak balapehkan
Samanjak kasiah kito padu
Di Singkarak aianyo tanang
Di sinan kito mamainkan
Mamadu cinto kito baduo

Kini denai marantak turun janjang
Nan bangkalai denai tinggakan
Nan kok lai bangkalai baju
Buliah lah Adiak sarayokan
Iko bangkalai kasiah sayang
Sia lah urang manyudahkan
Salain kito nan baduo

Oi gajai ,, Adiak oi