Buyuang Tasulo Kayie

  Rating: 0 ( 0 Votes)
Dikirimkan pada 12 May, 2014 | Dibaca: 42621 | Nomor Artikel: #0341
Sarankan Laporkan Print Favorit

Namo nan diagiah dek urang gaeknyo sabananyo Syafrul. 
Dek karano barasa dari Turawan Tigo Koto, baliau manambah namonyo jo kapendekan dari namo kampuangnyo Tutiko. 
Katiko basikola di Bukittinggi, kawan-kawannyo maimbau namonyo Rul Tutiko.

Tapi, namo sarupo itu indak laku di lapau Mak Sati.
Urang lapau labiah tabiaso jo namo keteknyo, Purun.
Dek kulikaiknyo satiok maiyokan jo kato tancap, urang lapau manambah pulo namo keteknyo itu manjadi Purun Tancap.

Ampek taun nan lalu, urang ribuik-ribuik mancilotehkan masalah otonomi daerah.

Kutiko urang Minang mandanga kaba nantun, rami-rami pulo urang di palanta lapau Mak sati mencilotehkan otonomi nagari.

Kutiko diminta untuak bapandapek, si Purun manjawek hanyo jo kato "tancap" sajo karano inyo indak mangarati jo ciloteh urang nantun.
Kutiko urang rami-rami bacurito tantang mukasuik urang nak ka babaliak ka caro banagari, urang salapau badebaik pulo tantang caro hiduik banagari nan ka dikumbalikan itu.

Purun masih manjawek ciek kato sajo kutiko diminta pandapeknyo dek Pakiah Maruhun.

"Baa kiro-kiro tu Purun?" Tanyo Pakiah Maruhun.
"Tancap, Mak Pakiah", jano Purun sakanainyo".
"Baa mangko tancap ka tancap sajo, Run?" Tambah Pakiah Maruhun.
"Ka baa juo lai, Mak Pakiah. 
Urang kini nan pantiang tampaknyo tancap sajo dulu. Hetongan bisuak, caliaklah bisuak sajo", jawek Purun.

Tambahan namo Tancap di muko nama Purun manjadi masahua dek karano kato itu hampia sajo mancilakokan urang banyak. 
Kutiko rombongan urang palau pai baburu ka Palangkih, Purun ikuik pulo.
Inyo duduak pas di balakang sopir. 
Manjalang Kelok Padang Lintang, Buyuang Medan-sang sopir-agak tagagau dek mancaliak induak-induak nan hanyo pakai indorok jo kutang sajo pulang dari aie. 
Sambia mancaliak induak-induak tu, Purun parungah pulo. 
Tapi, nan kalua dari muncuangnyo kato "tancap" jo suaro nan langkiang.

Buyung Medan nan sadang tagagau tu takajuik mandanga suaro Purun. 
Gas oto ditambahnyo, tapi pangananyo indak ka jalan. Cando kambiang takajuik, oto Buyuang Medan mandongkak kareh mahantam batang anau. 
Ikua oto tu tasarampang di batang dama. 
Kok indak ado batang dama nantun, mungkin sadoalah panumpang Buyuang Medan-tamasuak Purun--indak kan pernah mangunyah buah jarami lai.

Sasudah kajadian tu, Buyuang Medan malewakan tambahan namo Purun jo Tancap. 
Tamasahualah Purun Tancap di kalangan komunitas lapau Mak Sati.
Kajadian di Padang Lintang itu ruponyo mandatangkan parasaan indak lamak juo di hati Purun.

Satiok ado di lapau mak Sati, tatap inyo sajo dan manjadi sumber cameeh dek urang salapau. Purun indak bisa berang karano inyo juo pancimeeh.
Namun, inyo bana-bana mati kutu dek "tubo mancik" Buyung Medan. 
Sajak kajadian tu, Purun salalu talambek mancimeeh. 
Mancaliak perkembangan cimeeh di lapau Mak Sati alah mulai manyusahkannyo, Purun pun indak kahabisan aka.

Disulonyo Buyuang Medan jo ota tantang otonomi daerah dan rencana hiduik urang Minang babaliak ka caro banagari. 
Buyuang Medan tamakan sulo Purun nantun.

"Tampaknyo, lapau ko harus punyo harus punyo otonomi pulo dalam bagurau", kecek Buyuang Medan mangajuikan urang salapau.
"Tancap!", jawek Purun sambia maliek sendeng ka arah Buyuang.

"Kalau Purun alah mangatokan tancap, bararti saisi lapau alah tancap pulo tu mah, Buyuang", kecek Mak Sati sambia mangumpuakan kulik kacang nan taserak di meja muko Purun.

"Apo pulo otonomi nan ka diagiahkan ka lapau Mak Sati iko, Buyuang?" Tanyo Malin Sulaiman agak heran.
"Tampek biaso se, Mak. 
Urusan lapau lah jaleh sapanuahnya manjadi hak Mak Sati.

Kalau Purun nak mancuci galeh surang, Mak sati tantu indak buliah malarang karano itulah cito-cito Purun dari ketek. 
Purun iyo sabana manakah bakarajo jo Mak Sati", jawek Buyuang sambia manggemai tangan kida Purun.

"Otonomi macam apo pulo, tu Buyuang?" Tanyo Purun mambaleh gemai Buyuang.
"Indak jaleh dek aden tu.

Dikarang Oleh : Wisran Hadi

Artikel Terkait